الاثنينية ::المكتبة

مكتبة الاثنينية

الحلقة ـ 19 ـ

أم خالد: أما معركة أمس بين جارتنا وبين باصلوح كانت فظيعة.. فظيعة جداً.. لكنها حلوة..

أبو خالد: حلوة.. إيش اللي حلاّها..

أم خالد: لأنها شفت قلبي في جارة السوء.. خَلَّتها تعرف ألم الشتايم والسبّ ومرارته.. وخَلَّتها..

أبو خالد: وخَلَّتها إيش كمان؟..

أم خالد: تسقط من برجها العاجي زي ما يقولوا إلى أسفل السافلين..

أبو خالد: صحيح الخناقة ولسان باصلوح السليط كان صدمة مذهلة لجارتنا وكان قلة حيا وأدب من باصلوح..

أم خالد: بس أنت جازيتو على قلة أدَبُو بما يستحق..

أبو خالد: يا أم خالد احنا لازم نصبر على الجار ولو جار زي ما يقول المثل..

أم خالد: بس يا سيدي نسيت المثل التاني إيش يقول؟..

أبو خالد: إيش يقول.. هاتي يا أم الأمثال..

أم خالد: اصبر على جار السوء يا يعزّل يا تِجِيلُو (صَارْفَه)..

أبو خالد: لكني ماني شايف جارتنا رايحة تعزل ولا جيّ لها (صارفه)..

أم خالد: بداية (الصارفة) عاصفة باصلوح أمس.. بس ما قلت لي سوّيت إيش مع جوز جارتنا لما جالك..

أبو خالد: أسكتي يا شيخة لو اقل لك إيش صار تستغربي وتستعجبي ويمكن تضحكي.. على رأي المثل: ((شر البلية ما يضحك))..

أم خالد: طيب قل لي إيش سويت معاه.. أنت شوقتني أعرف إيش صار..

(نقلة صوتية مسبوقة بموسيقى نسمع بعدها صوت أبو خالد يقول):

أبو خالد: أتفضل يا جارنا.. أتفضل أنا آسف على اللي حصل..

الجار: ما في للأسف يا ابو خالد.. بس قل لي..

أبو خالد: اقل لك إيش؟

الجار: فين الصبي باصلوح؟..

أبو خالد: أنا طردتو إكراماً لخاطرك..

الجار: طردتو.. يا خسارة.. كنت أبغي أشوفوا.. يا خسارة..

أبو خالد: تشوفوا ليش.. تبغي تضربوا..

الجار: لا يا أبو خالد.. لا.. يا خسارة.. هوَّه فينْو؟

أبو خالد: طيب تسمح لي أسألك تبغي منّو إيش؟

الجار: أبغي أقبّل فموُّ الحلو..

أبو خالد: (مندهشاً) تقبل فم باصلوح.. وتقول كمان حلو.. ما هو ريحتو طالعة زي ريحة الطهارة..

الجار: تقول زي ريحة الطهارة دا زي ريحة المسك..

أبو خالد: يا جار أنت رايح تطلع في عقلي (ماليخوليا).. إيش هادا الكلام..

الجار: يا أبو خالد.. آه يا أبو خالد آه..

أبو خالد: وتتأوه يا جارنا وبحرقة كمان..

الجار: ايوا بحرقة وأي حرقة..أنت ما تعرف المعروف اللي عملوا فيّ باصلوح..

أبو خالد: وتقول باصلوح عمل فيك معروف..

الجار: ايوا.. معروف وأي معروف..

أبو خالد: يا إلهي أنا رايح اجّن من كلامك يا جارنا.. يا أنا في عقلي شيء.. يا..

الجار: يا أنا في عقلي شيء قول يا ابو خالد ولا تستحي..

أبو خالد: أنا آسف يا جار بس اترجَّاك إيش المعروف اللي عملوا باصلوح فيك؟..

الجار: باصلوح شفى قلبي وغليلي من الملعونة حرمتي خيبة الله عليها اللي ما سلم ولا واحد في الحارة ولا في غير الحارة من لسانها (الزفر) وأنا على رأسهم يا ما شتمتني يا ما لعنت أبو (سَنْسَفِيلْ) أبائي وأجدادي..

أبو خالد: قد كدا..

الجار: وإيش أقولك هادا بعض من فضائلها استغفر الله من مساوئها ورزايلها..

أبو خالد: وليش أنت صابر على كدا..

الجار: البزورة اللي خلفتهم منها كاسرين رقبتي..

أبو خالد: طيب خليك شوية (حمش) حمر عينك..

الجار: هوه أنا قادر.. أنا قادر أقولك على إيش؟

أبو خالد: قول…

الجار: أقلي البصل وأحمره في المطبخ..

أبو خالد: لا.. لا.. لازم تستعمل حقك كرجل.. أضرب.. اخبط إذا ما نفع الكلام بالتي هي أحسن..

الجار: يا أخي والله ماني قادر.. أنا لما أشوفها تكشر أرتجف وأستعيذ بالله من الشيطان الرجيم..

أبو خالد: أعانك الله يا جار على حالك..

الجار: طيب لي رجاء..

أبو خالد: إيش هوه..

الجار: ترجع باصلوح.. لأنو صار (البعبع) اللي تخاف منو حرمتي..

أبو خالد: قد كدا..

الجار: ايوا.. وما دام موجود عندك معناه سكون العاصفة في بيتنا.. ارجوك ترجع باصلوح..

أبو خالد: رجاك على العين والراس.. رايح أرجعه من الليلة..

الجار: كتر خيرك.. كمان في رجا ثاني..

أبو خالد: إيش هوه..

الجار: أنا رايح أفشر وأقول سويت وسويت كدا مع أبو خالد بس أوع تصدق وبعدين تزعل..

أبو خالد: قول وتْبَحْبَحْ على كيفك أنا رايح أعمل إِذِن من طينة وأذن من عجينة..

الجار: كتر خيرك يا أبو خالد.. بس أرجوك باصلوح لا تنسى ترجع باصلوح..

أبو خالد: كون مطمئن رايح ارجعوا دحين..

الجار: في أمان الله..

أبو خالد: مع السلامة..

أم خالد: والله حكاية غريبة.. مسكين جارنا مسكين يا حسرة مظلوم..

أبو خالد: مظلوم لا.. مو مظلوم.. يستاهل على راسوا شكل من كدا..

أم خالد: ليش يا سيدي ليش..

أبو خالد: لازم يكون لو شخصية.. لازم ما يركب حرمتو على راسو يكون راجل سبع مُو ضَبْع..

أم خالد: مسكين جارنا ما لو شخصية.. لكن ما تفتكر إنو في اسباب أو عيوب مخفية عند جارنا حتى فحّل عليه حرمتوا…

أبو خالد: يا ستي لو فرضنا عندو عيوب أو اسباب مخفية حرمتو ما لازم تستغلها وتمسح بي البلاط زي ما يقولوا..

أم خالد: أهو بختو كدا.. ربنا يعينو على بلواه.. طيب ودحين رايح ترجع باصلوح من أجل خاطر جارنا..

أبو خالد: ليش لا.. طالما صار باصلوح (البعبع) اللي يخوف جارتنا حتى نتريح نحنا ويتريحوا الناس من شرها..

(نقلة صوتية مسبوقة بموسيقى نسمع بعدها صوت الجارة تقول):

الجارة: اسمع يا (حوحو) أنا ما عاد اقدر استنى بهادي الشقة لازم نعزل ونشوف لينا شقة تانيه..

الجار: وليش يا روحي نعزل ما احنا مرتاحين في الشقة.. واسعة وإيجارها رخيص.. ومويتها ما تنقطع ومناظرها مو بطالة..

الجارة: بس جيراننا هم البطالين..

الجار: جيراننا.. ها..

الجارة: جيراننا.. أشوفهم رجعوا صبيهم (المزبلح) اللي عليه لسان أطول من ذنب الكلب..

الجار: بس أنت أخذت حقك كافي مكفّي..

الجارة: بس أنا خايفة من هادا اللي اسمو باصلوح يروح مرة تكون أنت مو هنا والأولاد مو هنا يطلع علي يخنقني ولا يقتلني لا.. لا.. لازم نعزل)..

الجار: أمرك (نعزل) بس لازم أول ندبر الشقة وبعدين (نعزل)..

الجارة: أنا أسكن في (رباط) ولا أسكن في هادي الشقة خلاص أنا خايفة خايفة..

الجار: تخافي وأنا جنبك..

الجارة: بس باصلوح.. زي الوحش والله لو مسكك (يفصفص) عضامك..

الجار: وإيش قَدَّرو.. ليش أنا مو رجل قدامك..

الجارة: أنت سيد الرجال..

الجار: (لنفسه) ربنا يخليك يا باصلوح..

الجارة: بس.. أنا نفسي انصدت من هادي الشقة وأبغي أغيرها..

الجار: طيب.. حاضر.. بس في عندي رأي..

الجارة: إيش هوه..

الجار: تحسني علاقتك مع جيراننا ووقتها باصلوح ما يقدر يسوي شيء معاك..

الجارة: أحسّن علاقتي مع جيراني بعد اللي صار منهم..

الجار: منهم ولاّ من باصلوح..

الجارة: منهم لأنو باصلوح ما تجرّأ إلا (بِنَفَسْهُمْ)..

الجار: بس أنا أشوف أننا مو رايحين نحصل شقة زي هادي وعشان كد لازم نصلح أمورنا مع جيراننا..

الجارة: يعني تفتكر باصلوح وقتها يخاف وما يؤاذينا..

الجار: أنا متأكد بكره باصلوح تشوفي هوه اللي يخدمك ويجيب لك حاجاتك وحاجات بزورتك كمان..

الجارة: بالله عليك يا سيدي..

الجار: (لنفسه) يا سيدي عمري ما سمعت الكلمة الحلوة دي منك ربنا يخليك ويقويك يا باصلوح..

الجارة: إيش تقول يا سيدي..

الجار: أقول يا ستي أنا رايح أعزم جيراننا على الفطور عندنا بكره..

الجارة: وتفتكر يقبلوا..

الجار: بكل تأكيد..

الجارة: وباصلوح..

الجار: وباصلوح هوه اللي رايح يجيب لنا الراس والكرشه والسقط..

طباعة

تعليق

القراءات :892

التعليقات :0

صفحة 19 من 83

من ألبوم الصور

المزيد >>

من أمسيات هذا الموسم

بتاريخ: 11/05/1436ھ الموافق: 03/02/2015م

الجمعية النسائية الخيرية الأولى بجدة

أول جمعية سجلت بوزارة الشئون الاجتماعية، ظلت تعمل لأكثر من نصف قرن في العمل الخيري التطوعي،في مجالات رعاية الطفولة والأمومة، والرعاية الصحية، وتأهيل المرأة وغيرها من أوجه الخير.

المزيد >>