فهارس الكتب عناوين الكتب محتويات الكتب أسماء المؤلفين الكل          البحث   

مكتبة الاثنينية
الحلقة ـ 15 ـ أبو خالد: قومي يا هو قومي.. أم خالد: إيش في يا سيدي.. أبو خالد: نسيتي.. أم خالد: إيش اللي نسيتو ذكرني.. الله يخليك.. أبو خالد: مشوار جده.. أم خالد: ايوالله.. تراني نسيتو.. يالله بينا.. أبو خالد: أنا تحضير نفسي ما يأخذ دقايق.. أما أنتو الحريم يبغا لكم ساعات.. أم خالد: وي يا سيدي تبغاني أروح لبيت عمتك بجده وأنا بهادي الحالة.. أبو خالد: يعني تبغى تتشرعَّي حتى تقابلي عمتي وجوزك اللي لازم تتزيانيلو (معلش) مع أن ربنا يقول: ولا يبدين زينتهن إلا لبعولتهن أو آبائهن.. أم خالد: وليش هادي التحية من الصبح.. أنا شايفني مبهدلة حالي في لباسي قدامك. عمال أنام في سريري بحوايج المطبخ أو أجلس على الأكل بفوطة المماسح.. الظاهر أنت ناوي عكننة اليوم.. أبو خالد: عكننة إيش يا شيخه.. أنت نفسك صارت ضيقة برمضان.. أم خالد: يا سلام على طول روحك برمضان.. أبو خالد: ها.. قولي.. مين بدا يجر الشكل.. شايفه كلامك دخل في العميق يالله صلي على النبي وألبسي حوايجك بسرعة.. أم خالد: اللَّهم صلي عليك يا نبي.. حاضر.. أبو خالد: بيت فوزية يبغونا نمر عليهم ونروح سوا لجدة.. أم خالد: ايوا يا سيدي ما هو بعد ما تسافر أم فوزية مع ولدها للبنان فوزية وأبوها رايحين يفطروا عند صديقه التاجر الجداوي واحنا عند عمتك.. أبو خالد: فوزية وأبوها يمكن يقعدوا كم يوم في جدة.. أصدقاء أبوها كتار فيها وسمعت عازمينهم على فطور في أَبحر.. أبو خالد: وبعدين يرجعوا مكة لحالهم.. أم خالد: ايوا لكن.. أبو خالد: لكن إيش.. أم خالد: سمعت أنهم يبغوا كمان يروحوا للمدينة يزوروا المسجد ويسلموا على الرسول صلى الله عليه وسلم.. أبو خالد: صلى الله عليه وسلم يا بختهم يا ريتنا معاهم.. أم خالد: يا ريت.. طيب واحنا أمتى نروح على المدينة.. أبو خالد: يا ريت.. زي العادة نسيتيها.. أم خالد: لا بس يمكن عندك رأي جديد.. أبو خالد: إن شاء الله في (27) رمضان نكون هناك نكمل بقية أيام الصومَ ونعيد ونرجع ثالث يوم العيد بإذن الله.. أم خالد: ربنا ما يقطع لك عادة يا سيدي.. أبو خالد: أنا خلصت.. خلصت انتي.. أم خالد: ايوا.. أبو خالد: بسم الله توكلنا على الله.. (نسمع صوت السيارة بعدها صوت فوزية تقول): أم خالد: والصبي باصلوح.. إيش تبغي تسوي فيه.. أبو خالد: باصلوح يقعد في البيت.. فطوروا عنده ومصروف القهوة والشاهي كمان وأنا قلتلوا يجيب العم عوض يفطر معه اليوم يسليه.. أم خالد: العم عوض قاعدة التمثال.. أبو خالد: عليكي نور.. ايوا العم عوض حارس عمارة جيراننا.. أم خالد: يالله يا سيدي.. بسم الله توكلنا على الله.. (نسمع أزيز السيارة مصحوبة بموسيقى مناسبة نسمع بعدها صوت فوزية تقول): فوزية: عمي أبو خالد تحير.. يمكن راحت عليه نومه.. سامي: كلميه بالتلفون.. أبو سامي: لا يا بنتي ما لو لزوم عمك أبو خالد حريص على المواعيد.. فوزية: أنا خايفه ميعاد الطيارة يفوت ماما وسامي.. أبو سامي: لسه في خمس ساعات على قيام الطيارة والمسافة قريبة.. بين جدة ومكة.. فوزية: ما هو الواحد لازم يكون هناك قبل وقت أحسن من وصوله بعد فوات الوقت.. سامي: لا تستعجلي يا أختي بابا معاه الحق فيه وقت كثير معانا وعمي أبو خالد سواق ماهر وسيارته جديدة موديل (71).. فوزية: طيب زي ما تقولوا.. سامي: اسمعوا.. هادا زامور سيارة عمي أبو خالد.. أبو سامي: ما قلت لك يا فوزية عمك حريص على المواعيد.. فوزية: في التأني السلامة وفي العجلة الندامة.. (تقف السيارة أبو خالد وينزل سامي لاستقباله).. سامي: يا مرحبا بعمي أبو خالد.. كلفنا عليك.. أبو خالد: بين الأهل ما في كلفة يا ولدي انتو حاضرين.. سامي: ايوا.. أبو خالد: فين الوالد؟.. سامي: جوّه يستناك تتفضل ترتاح شوية على بال نحط الشَّناطي بالسيارة وخالتي كمان تتفضل معاك.. أبو خالد: وهو كذلك.. يالله أم خالد.. إسبقيني لجوا.. (يدخل أبو خالد فيرحب به أبو سامي قائلاًً): أبو سامي: خطوة عزيزة يا أبو خالد.. أبو خالد: الله يعزك ويبارك فيك.. أبو سامي: كيف رمضان معاك.. أبو خالد: حلو زي (اللَّنقطه).. أبو سامي: يظهر نفسك في (لنقطه) اليوم.. أبو خالد: رمضان يزيد الشهية لأنواع كثيرة من الأطعمة والأشربة.. أبو سامي: صدقت وكمان رمضان له أنواع من الأكل ما تتاكل بشهية إلاّ فيه.. أبو خالد: سبحانه.. يعني (اللنقطه) يمكن ما تجي على بالي في كل السنة إلاّ في شهر رمضان.. أبو سامي: و (اللَّحوح) يا خويا نسيته.. أبو خالد: أشوفك كمان نفسك أنت في (لحوح)… أبو سامي: اللحوح أكلة العجايز اللي زي حالاتي.. طرية على الأسنان ولحمتها كمان طرية وعليها الدَّمعة يا سلام.. أبو خالد: أشوف معدنا ونفوسنا انفتحت على الطعام.. أبو سامي: ما هو هادا الحرمان أجره عند الله كبير.. أبو خالد: وكمان يخليك تفكر في غيرك من المحرومين على طول إما من الفقر أو المرض.. أبو سامي: الحمد لله يا شيخ على نعمة الصحة.. أبو خالد: ما هو المثل يقول: الصحة تاج على رؤوس الأصحاء لا يراه إلا المرضى.. أبو امي: اللَّهم نسألك العفو والعافية.. سامي: الشناطي في السيارة.. أبو خالد: والشناطي التانية كمان في السيارة.. أبو سامي: مين همّ.. أبو خالد: الحريم يا أبو سامي.. أبو سامي: يا سلام هوه في أحسن من الشناطي التانيه.. أبو خالد: الدنيا رمضان يا أبو سامي.. أبو سامي: اللَّهم إني صائم.. سامي: يالله تفضلوا الشناطي كلها بالسيارة.. (يضحكون وهم خارجون وأبو خالد يقول): أبو خالد: يا سامي تركب أنت وفوزية جنبي.. سامي: حاضر.. أبو خالد: بسم الله.. (يدير محرك السيارة فتسمع أزيزها ومشيتها نسمع بعدها صوت باصلوح وهو يقول): باصلوح: سلام يا عم عوض.. عوض: وعليك السلام.. خير إن شاء الله هادي الزيارة.. إيش سببها.. عمانك مو في البيت.. باصلوح: عماني راحو جدة.. عوض: راحو جدة.. ليش.. باصلوح: يوصلوا أم عمتي فوزية للمطار.. عوض: أم فوزية هيه المسافرة والاّ فوزية.. باصلوح: أم عمتي فوزية هيه المسافرة.. عوض: مسافرة.. رايحة فين.. باصلوح: لبنان.. عوض: ليش.. باصلوح: تشم هوا زي ما يقولون.. عوض: آه فهمت.. ماهيه المسكينة كانت مريضة ربنا يتمم لها بالشفا طيب وعمانك يطولوا بجدة.. باصلوح: ما أدري يمكن يطولوا ويمكن لا.. عوض: ليش ما قالوا لك راجعين متى.. باصلوح: قالوا الليلة قبل السحور لكن مين يدري.. عوض: كيف؟ باصلوح: يمكن يتسحروا هناك.. عوض: والله سحور جدة طيب يا باصلوح.. السمك الصيجان مع الرز الأبيض والزلطه يا سلام عليه من سحور.. باصلوح: قدك دقته يا عم عوض.. عوض: كتير يا ولدي.. ما أنا صمت بجدة قبل ما اطلع لمكة.. باصلوح: والله شوقتني وفتحت منافسي على أكلة حوت.. أروح أشتري لك (لخم) ونفطر سوا.. عوض: و (اللَّخم) يا مغفل زي السمك الصيجان.. باصلوح: ما كله سمك.. عوض: لو دقت السمك الصيجان كنت تعرف أنو ما في زيو في السحور مع الرز الأبيض والزلطة وبعدين براد شاي على الكيف.. باصلوح: وبعدين.. عوض: وبعدين تحمد الله وتشكره وتقوم تحضر حالك لصلاة الصبح.. باصلوح: ربنا يوعدنا بأكلة السمك اللي أكلت صرصورأذني (بمدحها).. عوض: ربنا يسمع منك.. باصلوح: يا عم عوض أنا جاي اقلك.. عوض: تقل لي إيش؟ باصلوح: اقلك تفطر عندي اليوم.. عوض: أنت لازم تفطر عندي أنا لأنو عمانك مسافرين.. باصلوح: بس عمي أبو خالد هوه اللي وصاني أعزمك على الفطور عندي.. عوض: يعني لو ما وصاك عمك ما تعزمني.. باصلوح: المسألة فيها قولان.. عوض: قولان على رأي الشافعي والا المالكي.. باصلوح: المسألة راجعة على حق الفطور.. إذا كان على حساب عماني فأنا كريم ولا كرم حاتم الطائي.. عوض: وإذا كان على حسابك.. باصلوح: فأنا بخيل ولا بخل الجاحظ.. (نسمع صوت محرك الطائرة يختلط بهمسات وهمهمات نسمع بعدها صوت أبو خالد): أبو خالد: مع السلامة.. أبو سامي: مع السلامة يا هو.. أكتب لنا يا سامي ما تنسى.. طمنا دائماً الله معاكم.. بسم الله مجراها ومرساها أن ربي على كل شيء قدير..
طباعة تعليق  القراءات :912  التعليقات :0
صفحة 15 من 83

من اصدارات الاثنينية

الاستبيان

هل تؤيد إضافة التسجيلات الصوتية والمرئية إلى الموقع
	تسجيلات كاملة
	مقتطفات لتسجيلات مختارة
	لا أؤيد
النتائج