فهارس الكتب عناوين الكتب محتويات الكتب أسماء المؤلفين الكل          البحث   

مكتبة الاثنينية
الرئيسية > كتاب الاثنينية > الأعمال الشعرية والنثرية الكاملة للشاعر والأديب الكبير حسين عبد الله سراج > الأعمال الكاملة للأديب الكبير حسين سراج - الجزء التاسع - المسرحيات الإذاعية > يوميات صائم > الحلقة الرابعة والعشرون
الحلقة ـ 24 ـ أبو خالد: (ينادي) باصلوح! يا واد باصلوح.. باصلوح: يا نعم يا عم.. أبو خالد: إيش مسوي يا واد؟.. باصلوح: إيش مسوي والله ماني داري يا عم ما بعد سويت ولا حاجه.. أبو خالد: وتقول ما سويت ولا حاجه.. أبو خالد: وتقول ما سويت ولا حاجه.. باصلوح: أيوا يا عم وباحلف.. أبو خالد: وتحلف وأنت في رمضان.. باصلوح: ما تقول يا عم أنت كركبت مصاريني.. أبو خالد: كركبت مصارينك ولما أنت تسوي عملتك في العم عوض.. ما تخاف أنك تروح في ستين داهيه.. باصلوح: كفانا الله شر الدواهي.. والدواهي العمياء.. أبو خالد: الله يعمي قلب الشيطان.. باصلوح: يا عم إيش اللي سويتو أنا بالعم عوض ما باتقول لي.. أبو خالد: يا شيخ جاتك قلة تشيلك.. باصلوح: أنا أبو سعيد قله تشيل عدوى يا عم.. بس أنا ما سويت شيء في العم عوض.. أبو خالد: وتنكر يا بعيد.. باصلوح: ما بذكر إني عملت بو حاجه.. أبو خالد: والحقنة اللي أعطيتهالو.. مين قال لك تعطيها.. أنت دكتور ولاّ ممرض.. باصلوح: (يبتسم) ويتابعها (بضحكة متقطعة).. أبو خالد: (غاضباً) وتضحك بالرغم من عملتك اللي عملتها.. باصلوح: كذا أنا.. أنا.. أبو خالد: أنت إيش.. أنطق يا بني آدم.. باصلوح: أنا ممرض ومعي شهادة.. أبو خالد: ممرض ومعاك شهادة.. باصلوح: مو كما ممرضين آخر زمان. أبو خالد: وكمان ممرض وامتى بسلامتك رايح تصير دك.. تور.. باصلوح: ممرض وقدني صرت أمَّا (تور) ما بعد أخذت شهادتها.. هيه لها شهادات كما شهادات المدارس.. أبو خالد: ايوا.. أنت ما تعرف؟ باصلوح: لا.. يا عم.. أبو خالد: شهادة من زريبة البهايم.. باصلوح: ها.. هادي لسه باقي لي سنين.. وسنين حتى أحصل عليها.. أبو خالد: يا بني آدم ليش أنت تحب تراوغ.. باصلوح: أراوغ كفانا الله شر المراوغة.. أنا قلت لك باحمل شهادة ممرض.. وأنت ما صدقتني.. أبو خالد: طيب هاتها.. وريني هيه.. باصلوح: بس مكتوبة بالإنجليزي وأنت يا عم ما تقرأ إنجليزي،، أبو خالد: والشهادة من فين.. باصلوح: من مدير مستشفى الباخرة (كوين فيكتوريا).. أبو خالد: الباخرة (كوين فيكتوريا) ومن مدير مستشفاها.. باصلوح: هو كذا.. أبو خالد: وإيش وصلك للباخرة (كوين فيكتوريا). باصلوح: رمضان خلاك تنسى كتير يا عم.. أبو خالد: كيف يا واد وأنت قلت لي قبل كدا.. باصلوح: أيوا قلت لك إني اشتغلت بالميل الإنجليزي لما سألتني فين تعلمت الإنجليزي،، أبو خالد: والله صحيح.. والله صحيح.. أتاريني صحيح.. نسّاي كبير.. طيب لا يمني على الشهادة يا بتاع الميلات.. لا يمني.. باصلوح: انزل أجيبها.. أبو خالد: بسرعة.. (موسيقى نسمع بعدها صوت أم خالد تقول): أم خالد: أنا سمعت كل حاجه.. أما صبي تحفة.. عجيبة.. هادا يمكن بكره يقول لنا أنو معاه شهادة دكتور أو صيدلي.. أبو خالد: ومو بعيد دكتور باطني ولاّ أمراض نساء.. أم خالد: لا.. لا.. كلو إلاّ طبيب أمراض نساء.. أبو خالد: لا تستغربي نحن عايشين شهر كلو مفاجآت.. أم خالد: ولكنها والحمد لله مفاجآت سارة.. أبو خالد: صدقيني إني ما أستغرب لو جاءني باصلوح وقال في يوم من الأيام إنو كان مع رواد الفضاء.. أم خالد: يعني في سفينة الفضاء.. وفي أيهم أبوللو (14) مثلاً.. أبو خالد: يمكن نزل من (أبوللو) (13) اللي ما وصل القمر وخرب في الطريق.. أبو خالد: مش بعيد يكون لعب فيه الواد باصلوح حتى خربو.. أم خالد: أشوفنا وصلنا يا أبو خالد للقمر.. أبو خالد: أي قمر؟ أم خالد: قمر الحشاشين.. (يضحكان بقهقهة).. (موسيقى نسمع بعدها صوت باصلوح يقول): باصلوح: عم.. عم.. وجدتها.. أبو خالد: إيش اللي وجدتها.. باصلوح: الشهادة.. أبو خالد: أنا أفتكرتك تقول (الصابونة).. طيب أطلع وريني هيه.. أم خالد: بعدين خدها وخلينا نرسلها لفوزية تقرأها حتة نشوف كذبو من صحيحو.. (يصعد باصلوح والموسيقى مصاحبة نسمعه بعدها يقول): باصلوح: خد يا عم.. تفضل.. شوف.. صبيك باصلوح.. إيش كان.. (يأخذ أبو خالد الشهادة فإذا هي مكتوبة باللغة الإنجليزية ومختومة وعلى الورق صورة الباخرة (كوين فكتوريا) فيقول): أبو خالد: يا سلام.. وكمان ممرض.. لو استمريت يمكن صرت دكتور.. طيب قل لي ليش ضربت العم عوض الحقنة مع أننا جايبين لو ممرض يضربوا هيه.. باصلوح: يا عم الممرض اللي جايبينوا ما هو ممرض.. أبو خالد: أمال إيش يا حضرة.. باصلوح: هادا صبي منجد.. غزّته للإبرة كما المنجدين.. عوّر عم عوض وطلع لو الدم ومرَّة كسر الإبرة (جوّات لحمه).. أبو خالد: وبعدين طلعت الإبرة.. باصلوح: أنا اللي طلعت لو الإبرة.. كنت حاضر وقتها وخاف الممرض وصار يرتْعِشْ من الخوف وبعدين أنا طلعتها بالطريقة اللي تعلمتها أيام زمان.. أبو خالد: أيام (كوين فيكتوريا) وبعدين.. باصلوح: قلت للممرض (صبي المنجد) لاعاد تجي.. احنا بانشوف غيرك وما صدق وفر كما يفر الجبان.. من المعركة.. أبو خالد: يا سلام يا سيبويه.. ولاّ جحشويه.. باصلوح: وجحشويه.. أنا ما سمعت به يا عم.. أبو خالد: هادا ابن عم (حمارويه).. باصلوح: لا يكون باتقصد (خمارويه) بت أحمد بن طولون حاكم مصر على أيام الدولة الطولونية.. أبو خالد: وعالم بالتاريخ.. كمان.. باصلوح: و (خمارويه) يا عم أبو ست الحسن والجمال (قطر الندى) اللي تزوجها الخليفة العباسي المعتضد بالله.. أبو خالد: لا.. لا.. أنت غلبت الأولين والآخرين ومن فين جبت المعلومات هادي.. باصلوح: قريتها في المجلات اللي يجمعها العم عوض.. أبو خالد: قرأتها إذن في مكتبة العم عوض.. باصلوح: أيوا عم عوض ترجاني أرتب له الجرائد والمجلات وأشوف إن كان فيها شيء من أرضه وشجر قرنفلها.. وبعدين قرأت.. أبو خالد: قرأت إيش؟ باصلوح: قرأت حكاية زواج قطر الندى بنت (خمارويه) وكيف سارت من (الفسطاط) إلى بغداد.. أبو خالد: تقول إيش (الفسطاط) وليش ما تقول القاهرة.. باصلوح: القاهرة ما كانت موجودة على أيام (خمارويه).. أبو خالد: أمال على زمان مين يا فهيم.. باصلوح: القاهرة بناها وأختطها (المعز لدين الله) الفاطمي وهادا كان بعد ستين أو سبعين سنة على وفاة (خمارويه). أبو خالد: لا.. لا.. أنا لازم أتلمذ على إيديك أفادك الله يا باصلوح أفادك الله.. باصلوح: و (الفسطاط) اختطها عمرو بن العاص بعدما افتتح مصر.. أبو خالد: يا سلام على معلوماتك الهائلة الغزيرة.. أنا رايح أسميك البحر الفهامة.. باصلوح: ما بعد يا عم صرت بحر.. قدى لسه قطرة في بحر.. يا عم لا تقول لي بحر بعدين يظنون إني فقيه.. أبو خالد: فقيه وفي أي مذهب.. باصلوح: المذهب الحنفي لأنو في كتاب اسمو.. اسمو.. البحر الرايق وهو من كتب الأصول في الفقه الحنفي.. أبو خالد: الله أكبر.. الله أكبر.. وكمان حضرتك تتواضع وما تبغاني أقول لك بحر أنا رايح أقول لك: (محيط).. باصلوح: لا يا عم.. أرجوك يا عم بعدين بايفتكروني (محيط المحيط للبستاني).. أبو خالد: اللَّهم زفني من محيط علومك ومعارفك يا باصلوح.. باصلوح: عم.. عم.. أبو خالد: إيش تبغي؟ باصلوح: أنا قدني مرة أترجيتك لا تزرع في الغرور.. خليني أشعر إني أنا صبيك وخدامك باصلوح وبس.. أبو خالد: يا سلام هادا تواضع العلماء.. باصلوح: عم.. سلامو عليكم.. أبو خالد: فين رايح يا باصلوح.. باصلوح: أشوف نفسي رايح على (أبوللو) (15) إذا باتستمر على هادا المديح والإطراء.. أبو خالد: خلاص.. بطلنا.. باصلوح: عم.. أبو خالد: إيش تبغي؟ باصلوح: تسمح لي الليلة بعد صلاة التراويح أروح لقهوة العم (حمدان).. أبو خالد: إيش اشتقت توسع معارفك وعلومك.. باصلوح: هو كذا… أبو خالد: وأنا معك.. (موسيقى تختلط بتصفيق أم خالد فيقول باصلوح): باصلوح: عمتي باتصفق قدها تبغي حاجة من السوق.. أبو خالد: أستنى أشوف.. يا هو.. تبغو شي.. أم خالد: أبغي أسدال الستار على الفصل الأخير في تمثيلية (باصلوح) فالمغرب على وشك الآذان.. أبو خالد: حاضر يا ستي حاضر.. أم خالد: خلي باصلوح يقطف لنا شوية خضرة للزلطة من الجنينة.. أبو خالد: حاضر.. أم خالد: ويشرح على كل حاجه فوائدها الصحية.. أبو خالد: وأنت من المؤمنين بعبقرية باصلوح.. أم خالد: الشاعر يقول.. أبو خالد: وأنت كمان شاعرة.. وقل ربِّ زدني علماً قولي أيتها الشاعرة.. أم خالد: إذا كان رب البيت بالدف ضارباً.. فشيمة أهل البيت كلهم الرقص..
طباعة تعليق  القراءات :926  التعليقات :0
صفحة 24 من 83

من اصدارات الاثنينية

الاستبيان

هل تؤيد إضافة التسجيلات الصوتية والمرئية إلى الموقع
	تسجيلات كاملة
	مقتطفات لتسجيلات مختارة
	لا أؤيد
النتائج