| إشكثر كنت آتسأَّلْ. |
| إشكثر قبل الزواج كنت آتسأَّلْ. |
| آقعد الساعات مع الناس، ما تِملَّلْ، |
| يالْربع أبـي الصراحه، |
| مول علي لا تجذبون. |
| الزواج بيني وبينكم، |
| شيْ عَدلْ والا ينون؟! |
| ما تركت من ربعي واحد، |
| ما سألته هالسؤال. |
| من كثر خوفي بغيت آسأل بعد |
| حتى اليهال! |
| ياهَلِ المعروف ترى ضاعت في ادروبي |
| عندي جم نوط، آتزوج؟ |
| والا، لا: آبقه اعزوبـي! |
| والله خايف منه هالقرقور، |
| ولو كان من ذهب. |
| زينه الحرية زينه، |
| حتى لو تكون من حطب. |
| راسي راس متروس وعاقل! |
| ليش آقط نفس اف مشاكل؟ |
| كنت آفكر ليل نهار في هالأمور. |
| حتى كنت ساعات آحس |
| راسي يدور. |
| والحياة، ما يصير تجاربها ابلاش. |
| وا لحقيقة ما تبان الا ابنقاش، |
| هذي كان تفكيري من قبل الزواج. |
| كنت آجذب، عقلي ساعه، |
| وساعه كنت آعتبره صاج. |
| * * * |
| الزواج جاوبني شايب |
| قال لي ذي حظُّ ونصيبْ |
| (لا تري)، ينجح فيه بعضهم |
| والبعض لازم يخيب. |
| والسعاده موب بلفلوس في الحياة. |
| السعاده، لين توفقت ابمره، |
| بين البنات. |
| روح تزوج.. |
| لا تردد واتحجج.. |
| الحذر فوق حده لين زاد ما يفيد. |
| واللي ما ينيشن ويرمي، |
| في القنص مول ما يصيد. |
| وأنت موب أول ولا آخر ولد. |
| اللي قبلك عرسوا من غير عدد. |
| يله جرِّب. |
| موب عجب لو مره في الألف، |
| حظك الزفت، يبقه طيب. |
| يمكن اتفوز لك ابدانه. |
| وتكتمل نص الديانه. |
| روحُ وجرب. |
| روحُ وجرب. |
| * * * |
| قلت في نفسي، هذي شايب |
| مخه خرفان وخراب. |
| ليش ما آروح، آسأل لي شاب. |
| الجواب يمكن يكون، عنده الجواب.، |
| * * * |
| رُحتَ سألت واحد آعرفه، |
| شاب من المتزوجين. |
| قلت له: يا فلان بالله قول لي: |
| الزواج زين هالسنين؟ |
| أبي من عندك نصيحه، |
| وأنت شيخ العارفين. |
| الزواج؟ جاوبني يضحك. |
| الزواج لا يخدعك شهر العسل. |
| والليالي الأولية والمواعيد والغزل. |
| الزواج موب كاب ثريد. |
| هذي شي يبي له واحد، |
| قلبه مصنوع من حديد. |
| الزواج يمكن يكون زين، |
| للي فوق الأربعين. |
| للي يبي يستقر، لكن بشرط، |
| بوكه سمين. |
| آنصحك مول لا تزوج! |
| حتى لو يقولون لك اتزوج بلاش! |
| حتى لو تاخذ مئة دينار معاش. |
| جم سنة ابتدفع أجار الشقة جم؟ |
| انت لو اتداوم على دفع الأجار، |
| يعني نص عمرك عدم. |
| ولين سمعت آخر الشهر ريّال يصيح: |
| افتح الباب، هذي بيل الكهربه. |
| غن على نفسك وقول: آه يا يبه. |
| مالها قيمة الدنانير يا رفيجي هالزمان. |
| الله يرحم يدِّي، خذ أربع حريم، |
| ولو حلال، جان خذ ثمان. |
| ما صرف ربع اللي راح مني، |
| في أيام الخطوبه. |
| وما لقه أدناة صعوبه. |
| والله غير لعزوبـي ما يقدر يعيش. |
| حشى لو يتعشه باجله ويتغده يريش. |
| آنصحك مول لا تزوج! |
| * * * |
| قلت في نفسي: هذي شخص، |
| باين عليه وايد يزيد. |
| ليس ما آروح آسأل لي واحد، |
| توَّه متزوج يديد |
| مرت الأيام وصدفه، |
| طب رفيق لي في العمل |
| رحت عقب مده آزوره، |
| قلت له: صِفْ لي ما حصل. |
| عطني رايك باختصار. |
| جنه إلعرس والا نار؟! |
| قال لي: لحظه. |
| وقام وتم مده ايتصوخ! |
| مرته كانت قاعده تطبخ. |
| قلت: أكيد خايف اتسمعك، |
| يلّه هات، بس مول لا تِشلخْ، |
| قال لي: روح باجر تزوج، |
| إنت تحتاج للأدب. |
| إجذبوا جذبه علي، قالوا لي: |
| قرقور من ذهب. |
| حَدْ يهد ديرة النعيم |
| حَدْ يقول: الحبس زين، إلا الغشيم. |
| تسوه جم طاير وحر بين العرب. |
| ما تخاف من لوم ولا تخاف من تعب. |
| لين رجعت البيت تنام لك مستريح. |
| ولين مشيت تمشي اتثنى من الطرب. |
| والله مينون اللي ياخذ له مره، |
| يقعد ايشاهدها طول عمره، |
| كأنها منظره. |
| والله يا عالم حرام. |
| والله لو كل ليلة آشاهد قمر |
| جان طِفشتْ منه وحنّيت للظلام. |
| روح تزوج، بس على نفسك تشهد، |
| قول على الدنيه السلام. |
| حد يجيس الكهربه! |
| حد يربِّي عقربه! |
| حد يطيح في حفره واعيونه تمام. |
| روح تزوج، بس على نفسك تشهّد، |
| قول على الدنيه السلام. |
| * * * |
| والله حيَّرتوني يا ناس بالكلام |
| مِنْ آصدق؟ مِنْ؟ ومنذي آستشير. |
| الزواج أمرٍ خطير. |
| قال لي رأي: روح استشير امطوَّعه. |
| يمكن ايفيدك كلامها ويمكن تكون منفعه. |
| يلّه قوم ما فيها شي. |
| يا ما شخص اتظنه ميت، |
| وهو لو جربته حيّ. |
| كنت سمعت عن حرمه طيبه، |
| عندها ابويت في المنامه. |
| ويوم سألت عنها أوصفوها، |
| وميزوا بيتها ابعلامه. |
| ناس يقولون عنها طاهره. |
| وناس يقولون عنها ساحره، |
| قلت في نفسي: طاهره ساحره، |
| يلّه روح. |
| جربيت كل الفلاسفة، |
| وذي بعد إنسانه، روح. |
| يمكن اتحل القضيه، أو تسلِّيك ابكلام. |
| إهي دينارين ثلاثة، والزياره موب حرام. |
| كانت الساعة تسع بعد العشه، |
| وكانت الدنيه ظلام. |
| ويوم ضربت الباب، ومرّت، |
| خمس دقايق بالتمام. |
| رد علي صوت من وره الباب، |
| قال لي: مِنْ؟ جاوبت صديج. |
| ياي تحلّون له قضيه، |
| من سِنه اتسبّبْ له ضيج. |
| قال تفضل. وانفتح لي الباب، |
| وبدّيت بالسلام. |
| وقادني شخص من يديْ. |
| وقال لي: ممنوع الحجي. |
| الا لما اتْسئلِكِ الحجيه، |
| جاوبْ باحترام. |
| * * * |
شارع عبد المقصود خوجة
00966-12-6982222 - تحويلة 250
