فهارس الكتب عناوين الكتب محتويات الكتب أسماء المؤلفين الكل          البحث   

مكتبة الاثنينية
الرئيسية > كتاب الاثنينية > الأعمال الشعرية والنثرية الكاملة للشاعر والأديب الكبير حسين عبد الله سراج > الأعمال الكاملة للأديب الكبير حسين سراج - الجزء التاسع - المسرحيات الإذاعية > يوميات صائم > الحلقة الثامنة
الحلقة ـ 8 ـ أم خالد: أنا انفجعت أمس لما سمعت البكا - وما عرفت مين اللي كان يبكي.. الصوت غريب.. أبو خالد: أنا كمان انفجعت لما شفتو يبكي بحرقة راجل في حجم الدّبابة ويبكي زي البزورة.. أم خالد: لازم كان مجنون في حبها.. أبو خالد: هادا التعليل الوحيد لبكائه المرّ.. أم خالد: واليوم يبغي يكمل لك القصة.. أبو خالد: ايوا.. أم خالد: يا ريت أقدر أستمع للقصة.. أبو خالد: بسيطه.. أجلس في الأوضه المطلة على الحديقة وأنت تسمعي كل شيء لأن عم عوض صوتو يلعلع يمكن تقدري تسمعيه وأنت في المطبخ.. باصلوح: (ينادي) عوض وصل يا عم.. أبو خالد: خليه يخش في الحديقة محل أمبارح.. أم خالد: أنا ألقي نظرة على المطبخ وبعدين احتل مكاني في اللُّوج.. (نقلة صوتية مسبوقة بموسيقى نسمع بعدها عوض يقول): عوض: عمك فوق يا واد.. باصلوح: ايوا يا عم.. عوض: ها أوع تماوي.. أنا فاطن أنت كنت رايح تقول إيش.. باصلوح: كأنك على لساني.. عوض: أبغي أقل لعمك يقطع لسانك حتى ما تقول: عم جمعان.. باصلوح: خلاص.. أنا تبت.. بس لا تقل لعمي بو خالد.. (ينزل أبو خالد فيقول باصلوح): عمي نازل.. عوض: يا مرحبا.. يا مرحبا بعمك.. أبو خالد: أهلاً بالعم عوض.. عوض: الله يخليك يا عم بو خالد.. أبو خالد: أجلس يا عوض.. أجلس.. أنت قومتك وقعدتك صعبة.. عوض: من كثيب الشحم واللحم يا عم.. (يضحكان) أبو خالد: قل لي.. مستعد تكمل الحكاية ولاّ رايح تفتح مناحة زي أمبارح.. عوض: لا يا عم.. سأتجلد.. سأصبر.. أبو خالد: هيا قل.. عوض: وأقسمت بعد وفاة (رمانة) أن أرتدي السواد حزناً عليها طول عمري.. أبو خالد: إذن هادا سِرّ لبسك للسواد.. عوض: ايوا يا عم.. أبو خالد: والمرحومة رمانة من أي بلد؟ من زنزبار؟ عوض: من أم درمان؟ أبو خالد: إذن رمانة من السودان.. دحين عرفت.. عوض: عرفت إيش يا عم.. أبو خالد: باصلوح كان يقول لي أنو دايماً يسمعك تردد شعر عن أم درمان هيا سمعنا.. عوض: الفَرْخ باصلوح قالك.. أبو خالد: ايوا.. عوض: بي بعادنا وحكم الزمان طال هجرك يا أم در أمان مرّة تحلى ومرّة تمر الليالي وطبعاً تمر واللَّه فراقك في الجوف جمر المسبّل للَّه الأمور أبو خالد: كلام حلو يا عوض.. عوض: زي أهلها الحلوين.. أبو خالد: طيب فهمنا لبسك السود.. لكن ايش هوه سر تلهفك على جمع الجرايد والمجلات.. عوض: لي أرض في جزيرة (بمبا) جنب جزيرة زنزبار.. أبو خالد: ايوا.. عوض: وفي الأرض مية شجرة قرنفل.. أبو خالد: مية شجرة قرنفل.. أنت من الأغنياء.. عوض: وكنت ناوي أبيع الأرض بعدما تجوزت أمي واسافر على (نيروبي).. أبو خالد: نيروبي عاصمة كينيا.. عوض: ايوا.. أبو خالد: وبعدين؟ عوض: عرف جوز أمي.. أتسلط عليّ وصار يضربني حتى أجبرني على الهرب.. أبو خالد: لكن ما قلت ليش تجمع الجرايد والمجلات.. عوض: أجمع الجرايد والمجلات حتى أشوف إيش سوى الشيوعيين اللي احتلوا بلدي بأرضي.. أبو خالد: قول عليها السلام.. الشيوعيون لا بد صادروها وحرقوها زي ما حرقوا كتير من أشجار القرنفل في زنزبار.. عوض: ربنا يهلكهم.. ربنا يخرب ديارهم بس.. أبو خالد: بس إيش.. عوض: يمكن ربنا عمى عيونهم عن أرضي لأني ضعيف.. مسكين.. أبو خالد: هدولا زي الجراد يأكلو الأخضر واليابس.. عوض: أمري لله يا عم برضو خليني أجمع الجرايد والمجلات.. أبو خالد: ليش يا عوض.. عوض: الأمل يا عم يمكن أسمع أو اقرأ فيها خبر عن أرضي.. أبو خالد: ليش ما تكتب لمعارفك هناك.. عوض: معارفي كلهم راحوا في المجزرة اللي عملوها الشيوعيون ويمكن أميّ المسكينة كانت معاهم.. أبو خالد: ربنا يعقلك على أرضك.. ويخلص بلدك من ظلم الشيوعيين واحتلالهم.. عوض: ربنا يسمع منك.. يا رب.. يا رب.. أبو خالد: (ينادي) باصلوح.. باصلوح: يا نعم.. يا نعم.. أبو خالد: المدفع قرب.. ولا تنسى عمك عوض من الفطور معاك.. باصلوح: زين يا عم زين.. عوض: كتر خيرك يا بوخالد.. دارك عامرة.. (نقلة صوتية مسبوقة بموسيقى نسمع بعدها همهمة وغمغمة وأصوات تعلو وتنخفض وصوت أكثر من ولد يقول): ولد: برَّاد أبو أربعة.. قهوة استامبولي.. ولد: شيشه حُمِّى.. شيشه حَجَرْ.. ثلاجه مويا.. ولد: براد أبو ثمانيه.. قهوة مضبوطة.. باصلوح: إيش تشرب يا عم.. أبو خالد: شاهي.. ولد: براد أبو أربعة.. باصلوح: تبغي شيشه يا عم.. أبو خالد: من أمتي أنا يا واد شفتني أشرب شيشه.. باصلوح: قلت يمكن نفسك اشتهت نفس.. أبو خالد: القهوة حلوة ونضيفه.. والشيش لياتها مزركشة وجديدة.. باصلوح: أنا قلت لك يا عم أبغي أوريك القهوة الجديدة.. أبو خالد: صحيح إنها جديدة في كل شيء.. اسمع يا باصلوح.. باصلوح: نعم يا عم.. أبو خالد: هناك (في) حلقة جالس في وسطها عجوز لحيته بيضاء كأنها (ظبدية) لبن.. وقدامه شيشة ليّها زي قوس قزح.. باصلوح: أنا شايفه.. هادا المعلم (دحمان) صاحب القهوة.. أبو خالد: طيب والناس متجمعين حواليه ليش؟ باصلوح: تبغي تعرف يا عم ليش.. أبو خالد: ايوا يا واد.. باصلوح: قوم يا عم.. أبو خالد: فين يا واد.. باصلوح: ننتظم مع المنتظمين في حلقة المعلم (دحمان).. أبو خالد: ليش الجميع منصتين وكأن على رؤوسهم الطير.. باصلوح: لأن المعلم (دحمان) جهبذ من جهابذة الحارات.. أبو خالد: ليش يشد كلماته وعباراته مرة بطريقة (أمريكية) ومرة (يمطها).. باصلوح: هادي طريقة المعلم (دحمان) في التأثير على مستمعيه.. طريقة (فتوة) الحارات.. (نقلة صوتية مسبوقة بموسيقى نسمع بعدها صوت أحد الحاضرين في الحلقة يسأل): أحدهم: معلم دحمان.. دحمان: قول يا والد.. إيش تبغي تسأل.. أحدهم: الزير أبو ليلى المهلهل أمّو اسمها إيش.. دحمان: ودا سؤال يا حِدِقْ.. أحدهم: اسمها إيش؟ دحمان: ويبغالو تفكير يا لِِمِِِض.. اسمها ليلى وإمّا تصدق روح أقرأ سيرة المهلهل أخو كليب وأنت تشوف اسم أموّ مكتوب فيها.. أصوات: (استحسان) يا سلام.. يا سلام.. يا معلم.. أحدهم: وأبو زيد الهلالي فين أقرأ عنّو.. دحمان: أنا يا واد ماني عارف إيش يقروكم بالمدارس.. يظهر الأساتذة حقونكم فهمهم على قدهم أقرأ تغريبة بني هلال تلقى فيها أخبار وفروسية أبو زيد الهلالي.. أصوات: يا سلام يا معلم.. يا سلام.. باصلوح: أما المعلم (دحمان) معلم فهمان ويعرف كيف يتخلص ويتهكم بطريقة تذكرنا بزميله (برنارد شو).. أبو خالد: ونت كمان يا واد وصلت (لبرنارد شو) أنت معلم قوم وخذ مكان المعلم (دحمان).. باصلوح: بس أنا لسه معلم صغير. لمّا يشيب رأسي وتشيب دقني يمكن أصير معلم قد الدنيا.. أبو خالد: أوعى يركبك الغرور يا واد ترى يوديك في داهيه.. باصلوح: أبغي أقول يا عم بس ما تزعل علي.. أبو خالد: قول وتبحبح الليلة ليلة فرفشة وبحبحة.. باصلوح: مديحك ليّ يا عم هوه اللي رايح يوديني في داهيه.. أبو خالد: خلاص ماني رايح أمدحك بعد الليلة.. أحدهم: معلم دحمان.. دحمان: إيشبك يا واد.. إيش كمان عندك.. أحدهم: مين من الخلفاء جا جده.. سيدنا عمر وإلاّ سيدنا عثمان.. دحمان: أنت يا واد مسحوب من لسانك.. دائماً تجيب أسئلة تفتكر تعجزني بيها.. أحدهم: أستغفر الله يا عم.. دحمان: سيدنا عثمان بن عفان يا واد يا حدق.. هو الخليفة اللي جاجِدَّه.. أصوات: يا سلام يا معلم.. يا سلام.. أحدهم: وليش تقول جِدّه مو جُدّه.. دحمان: تعرف ليش.. أصوات: لا يا معلم.. دحمان: جده أصل اسمها جَلْدَهْ ومع مرور الزمان تحرفت وصارت جده.. أحدهم: يعني بكسر الجيم.. دحمان: ايوا.. أحدهم: بس كُتّاب الأيام هادي يا معلم يقولو غير كدا.. دحمان: وإيش عرّفهم وإيش فهمهم بهادي الأمور.. هادول يبغالهم سنين وأيام حتى يصلو لهادي المواصيل.. أصوات: براوا يا معلم.. براوا يا معلم.. دحمان: (معتزاً) دا كلام وعلم سمعناه من جدود الجدود.. هات اجعص واحد إن كان يقدر يقول كلام غير هادا يبقى لك الحق عندي.. (وعلت أصوات الاستحسان وطلب الاستزادة من بحر العالم الأوحد.. ويتطلع أبو خالد إلى ساعته فإذا بينه وبين مدفع السحور ربع ساعة فقال): أبو خالد: يالله يا باصلوح.. باقي للسحور ربع ساعه يا دوب نوصل للبيت..
طباعة تعليق  القراءات :772  التعليقات :0
صفحة 8 من 83

من اصدارات الاثنينية

الاستبيان

هل تؤيد إضافة التسجيلات الصوتية والمرئية إلى الموقع
	تسجيلات كاملة
	مقتطفات لتسجيلات مختارة
	لا أؤيد
النتائج